नैना निपट बंकट छबि अटके।
देखत रूप मदनमोहन को, पियत पियूख न मटके।
बारिज भवाँ अलक टेढी मनौ, अति सुगंध रस अटके॥
टेढी कटि, टेढी कर मुरली, टेढी पाग लट लटके।
मीरा प्रभु के रूप लुभानी, गिरिधर नागर नट के॥

हरि तुम हरो जन की भीर।
द्रोपदी की लाज राखी, तुम बढायो चीर॥
भक्त कारण रूप नरहरि, धरयो आप शरीर।
हिरणकश्यपु मार दीन्हों, धरयो नाहिंन धीर॥
बूडते गजराज राखे, कियो बाहर नीर।
दासि 'मीरा लाल गिरिधर, दु:ख जहाँ तहँ पीर॥

दरस बिन दूखण लागे नैन।जबसे तुम बिछुडे प्रभु मोरे कबहुँ न पायो चैन॥
सबद सुणत मेरी छतियाँ काँपै मीठे लागे बैन।बिरह कथा कासूँ क सजनी बह गई करवत ऐन॥
कल न परत पल-पल मग जोवत भई छमासी रैन।'मीरा के प्रभु कब रे मिलोगे दु:ख मेटण सुख दैन॥

मन रे परस हरि के चरन
सुभग सीतल कमल कोमल, त्रिबिध ज्वाला हरन।
जे चरन प्रहलाद परसे, इंद्र पदवी धरन॥
जिन चरन ध्रुव अटल कीन्हों, राखि अपने सरन।
जिन चरन ब्रह्माण्ड भेंटयो, नख सिखौ श्री भरन॥
जिन चरन प्रभु परसि लीने, तरी गौतम घरन।
जिन चरन कालीहिं नाथ्यो, गोप लीला करन॥
जिन चरन धारयो गोबर्धन, गरब मघवा हरन।
दासि 'मीरा लाल गिरिधर, अगम तारन तरन॥

पग घुँघुरू बाँध मीरा नाची रे।
मैं तो मेरे नारायण की आपहिं हो गई दासी रे।
लोग कहै मीरा भई बावरी न्यात कहै कुलनासी रे॥
बिषका प्याला राणाजी भेज्या पीवत मीरा हाँसी रे।
'मीरा के प्रभु गिरिधर नागर सहज मिले अविनासी रे॥

मेरे तो गिरधर गोपाल दूसरो न कोई।
जाके सिर मोर मुकट मेरो पति सोई।
तात मात भ्रात बंधु आपनो न कोई॥
छाँडि दई कुल की कानि कहा करिहै कोई।
संतन ढिंग बैठि-बैठि लोक लाज खोई।
चुनरी के किये टूक ओढ लीन्हीं लोई।
मोती मूँगे उतार बनमाला पोई॥
ऍंसुवन जल सींचि सींचि प्रेम बेलि बोई।
अब तो बेल फैल गई आणँद फल होई॥
दूध की मथनिया बडे प्रेम से बिलोई।
माखन जब काढि लियो छाछ पिये कोई॥
भगत देखि राजी हुई जगत देखि रोई।
दासी 'मीरा लाल गिरिधर तारो अब मोही॥

पायो जी म्हें तो राम रतन धन पायो॥
वस्तु अमोलक दी म्हारे सतगुरु, किरपा करि अपनायो॥
जनम-जनम की पूँजी पाई, जग में सभी खोवायो।
खरच न खूटै चोर न लूटै, दिन-दिन बढत सवायो॥
सत की नाव खेवटिया सतगुरु, भवसागर तर आयो।
'मीरा के प्रभु गिरधर नागर, हरख-हरख जस गायो॥

बसौ मोरे नैनन में नंदलाल।
मोहनि मूरति, सांवरी सूरति, नैना बने बिसाल।
मोर मुकुट, मकराकृत कुंडल, अस्र्ण तिलक दिये भाल।
अधर सुधारस मुरली राजति, उर बैजंती माल।
छुद्र घंटिका कटि तट सोभित, नूपुर सबद रसाल।
मीरां प्रभु संतन सुखदाई, भगत बछल गोपाल।

नहिं ऐसो जनम बारंबार।
का जानू कछु पुण्य प्रगटे, मानुसा अवतार।
बढ़त पल पल, घटत छिन छिन, जात न लागै बार।
बिरछ के ज्यों पात टूटे, बहुरि न लागै डार।
भौ सागर अति ज़ोर कहिए, अनंत ऊंडी धार।
राम नाम का बांध बेड़ा, उतर परले पार।
ज्ञान चौसर मंडी चोहटे, सरत पासा सार।
या दुनिया में रची बाज़ी, जीत भावें हार।
साधु, संत, महंत, ज्ञानी, चलत करत पुकार।
दास मीरां लाल गिरिधर, जींवणा दिन च्यार।

मेरे तो गिरिधर गोपाल दूसरौ न कोई।जाके सिर मोर मुकुट मेरो पति सोई।।
छांड़ि दई कुल की कानि कहा करै कोई।संतन ढिग बैठि बैठि लोक लाज खोई।
अंसुवन जल सींचि सींचि प्रेम बेलि बोई।दधि मथि घृत काढ़ि लियौ डारि दई छोई।
भगत देखि राजी भइ, जगत देखि रोई।दासी मीरा लाल गिरिधर तारो अब मोई।

भज मन चरण-कंवल अबिनासी।
जेताइ दीसै धरण-गगन बिच, तेताइ सब उठ जासी।
इस देही का गरब न करणा, माटी में मिल जासी।
यो संसार चहर की बाजी, सांझ पडयां, उठ जासी।
कहा भयो तीरथ ब्रत कीने, कहां लिए करवत कासी?
कहा भयो है भगवा पह्रयाँ, घर तज भये सन्यासी?
जोगी होइ जुगत नहि जाणी, उलट जनम फिर आसी।
अरज करौं अबला कर जोरे, स्याम तुम्हारी दासी।
'मीरां' के प्रभु गिरधर नागर, काटो जम की फाँसी।

या ब्रज में कछु देख्यो री टोना।लै मटुकी सिर चली गुजरिया,
आगे मिले बाबा नंदजी के छोना।दधि को नाम बिसरि गयो प्यारी,
लैलेहु री कोई स्याम सलोना।वृंदावन की कुंज गलिन में,
नेह लगाइ गयो मनमोहना।मीरा के प्रभु गिरिधर नागर,
सुंदर स्याम सुघर रस लोना।